មូលនិធិកំពង់ដេវ៉ា ប្រគល់អណ្តូងទឹកស្អាត និងបន្ទប់ទឹកអនាម័យ ជូនសហគមន៍ភូមិអុង ខេត្តព្រះសីហនុ

(ខេត្តព្រះសីហនុ)៖នៅថ្ងៃទី០២ ខែសីហា ឆ្នាំ២០២៦ មូលនិធិកំពង់ដេវ៉ា (KDF) នៃក្រុមហ៊ុនកំពង់ដេវ៉ា រីហ្សត បានរៀបចំពិធីប្រគល់ជាផ្លូវការ នូវអណ្តូងទឹកស្អាតចំនួន ៤ និង បន្ទប់ទឹកអនាម័យចំនួន ៤ ជូនសហគមន៍ភូមិអុង សង្កាត់រាម ខេត្តព្រះសីហនុ បន្ទាប់ពីគម្រោងសាងសង់បានចាប់ផ្តើមកាលពីថ្ងៃទី៣១ ខែឧសភា ឆ្នាំ២០២៦។

ពិធីនេះមានការចូលរួមពីអាជ្ញាធរមូលដ្ឋាន ថ្នាក់ដឹកនាំភូមិ តំណាងសហគមន៍ ដៃគូសាងសង់ អ្នកស្ម័គ្រចិត្ត និងថ្នាក់ដឹកនាំ ព្រមទាំងបុគ្គលិកកំពង់ដេវ៉ា ក្នុងបរិយាកាសពោរពេញដោយកិច្ចសហការ និងការប្តេជ្ញាចិត្តអភិវឌ្ឍសហគមន៍។

លោក ឱ ភន មេភូមិអុង បានថ្លែងអំណរគុណចំពោះមូលនិធិកំពង់ដេវ៉ា និងកំពង់ដេវ៉ារីហ្សត ដែលបានជួយផ្តល់ប្រភពទឹកស្អាត និងបន្ទប់ទឹកអនាម័យ ដើម្បីលើកកម្ពស់សុខភាព និងគុណភាពជីវិតរបស់ប្រជាពលរដ្ឋ។

ជំនួសមុខឱ្យក្រុមហ៊ុន លោក ថមមី ភី ហើម៉ាវ៉ាន់ នាយកប្រតិបត្តិ បានលើកឡើងថា កំពង់ដេវ៉ារីហ្សត និងមូលនិធិកំពង់ដេវ៉ា នឹងបន្តវិនិយោគលើគម្រោងដែលឆ្លើយតបនឹងតម្រូវការពិតរបស់សហគមន៍ ក្រោមទស្សនវិស័យ “ប្រជាជនរីករាយ សហគមន៍រីករាយ”។

ក្នុងកម្មវិធីក៏មានពិធីកាត់ខ្សែបូសម្ពោធ ការប្រគល់សមិទ្ធផលជាផ្លូវការជូនមេភូមិ និងតំណាងសហគមន៍ ព្រមទាំងការចុះពិនិត្យអណ្តូងទឹក និងបន្ទប់ទឹកអនាម័យ ដែលត្រៀមរួចជាស្រេចសម្រាប់ការប្រើប្រាស់។

លោកស្រី អែនជីអូឡាញ ស៊ី វីលែននូអេវ៉ា (Angioline C. Villanueva) បានថ្លែងអំណរគុណដល់អាជ្ញាធរ អ្នកស្ម័គ្រចិត្ត បុគ្គលិក និងដៃគូទាំងអស់ ដែលបានរួមចំណែកធ្វើឱ្យគម្រោងនេះសម្រេចជោគជ័យ និងអាចផ្តល់អត្ថប្រយោជន៍យូរអង្វែងដល់សហគមន៍។

គម្រោងនេះឆ្លុះបញ្ចាំងពីការប្តេជ្ញាចិត្តរបស់មូលនិធិកំពង់ដេវ៉ា ក្នុងការលើកកម្ពស់ការទទួលបានទឹកស្អាត អនាម័យ សុខភាពសាធារណៈ និងការអភិវឌ្ឍប្រកបដោយចីរភាព។ មូលនិធិបញ្ជាក់ថា នឹងបន្តអនុវត្តគម្រោងទំនួលខុសត្រូវសង្គមបន្ថែមទៀត ដើម្បីកសាងសហគមន៍ដែលមានសុខភាពល្អ និងគុណភាពជីវិតកាន់តែប្រសើរ។

សូមបញ្ជាក់ថា កំពង់ដេវ៉ារីហ្សត គឺជាគម្រោងទេសចរណ៍ និងបដិសណ្ឋារកិច្ចដ៏ទំនើបនៅក្រុងព្រះសីហនុ ដែលរួមបញ្ចូលសណ្ឋាគារ កន្លែងកម្សាន្ត និងគម្រោងអភិវឌ្ឍន៍ជាច្រើន។ មូលនិធិកំពង់ដេវ៉ា ជាផ្នែកមួយនៃកម្មវិធីទំនួលខុសត្រូវសង្គម (CSR) របស់ក្រុមហ៊ុន ដែលផ្តោតលើការអភិវឌ្ឍសហគមន៍ និងការបង្កើតផលប៉ះពាល់វិជ្ជមានប្រកបដោយចីរភាព៕